"Leitin-hugtakasafn úr Biblíunni" er tekinn saman af Jóni Sætran, en Kristinn Snævar Jónsson sá um skipulagningu á uppsetningu textans varðandi notkun kaflanúmera og innbyrðis tilvísun.

Samantektin er annars til frjálsrar notkunar fyrir lesendur, en má hins vegar ekki nýta til endursölu í neinum söluumbúðum þriðja aðila án leyfis aðstandenda.

Jón hafði gert ráð fyrir því að Hið Íslenska Biblíufélag sæi um dreifingu á efninu til notenda, td leikmanna við kennslu, nám og lestur, með þeim hætti að prenta efnið eftir beiðnum út á pappír og senda svo viðkomandi. Móttakendur áttu aðeins að greiða beinan útprentunar- og sendingarkostnað. Á þessum tíma var Internetið ekki komið til sögunnar en Jón hefði sjálfsagt tekið þeim dreifingarmiðli fagnandi vegna útbreiðslu og hagkvæmni þess miðils.

Jón vann við gerð textans í mörg ár sem leikmaður af hugsjón allt til dauðadags 1993. Síðustu sjö æviárin var hann hálf-lamaður vinstra megin en sló þá inn textann í tölvu með fingrum, eða nánast einum fingri, annarar handar af ótrúlegri seiglu.

Hann frumskrifaði alltaf allan texta fyrst á pappír þegar hann var búinn að velja versin sem við áttu á hverjum stað.
Ramminn fyrir valið var einmitt sú efnisskipan sem hann hannaði og birtist í skilgreiningu kaflanna og þeirri innbyrðis uppröðun málefna sem fram kemur í þeim.

Með þessum hætti vildi hann auðvelda lesandanum að nálgast Biblíuna og boðskap hennar við daglega notkun háð tilefni og eftir því sem spurningar vöknuðu um tiltekin atriði daglegs lífs.

Auk þessarar samantektar á Biblíutextum, sem hann kallaði "Hugtakasafn", vann hann einnig aðra samantekt sem hann kallaði "Orðalista" fyrir Biblíuna. Hún er nokkuð umfangsmeiri en Hugtakasafnið sem hér um ræðir og með myndum líka!